09/10/2024 | Press release | Distributed by Public on 09/10/2024 08:21
Fimmta skýrsla Íslands um samninginn um efnahagsleg, félagsleg og menningarleg réttindi (CESCR) var tekin fyrir á fundi nefndar Sameinuðu þjóðanna um efnahagsleg, félagsleg og menningarleg réttindi í Genf 9. og 10. september.
Í skýrslunni er fjallað um hvernig Ísland hefur uppfyllt skyldur sínar samkvæmt samningnum og þær aðgerðir sem gripið hefur verið til í því skyni að uppfylla tilmæli nefndarinnar um nauðsynlegar úrbætur.
Ísland fullgilti samninginn árið 1979 og tryggir hann ýmis grundvallarréttindi sem varða tækifæri og möguleika fólks til að lifa mannsæmandi lífi. Ákvæði samningsins ná yfir breitt svið réttinda á borð við réttinn til að afla sér lífsviðurværis, réttinn til að njóta líkamlegrar og andlegar heilsu og réttinn til menntunar. Áhersla er lögð á að allir einstaklingar hafi jöfn tækifæri til að njóta þeirra réttinda sem samningurinn verndar.
Í fyrirtökunni var fjallað um stöðu mannréttinda í íslensku samfélagi og aðgerðir stjórnvalda í því sambandi. Nefndin lagði sig sérstaklega eftir því að kanna hvernig íslensk stjórnvöld hafa brugðist við áskorunum í íslensku samfélagi frá síðustu fyrirtöku árið 2012. Jafnframt var horft til framtíðar varðandi ýmsa þætti sem fyrirhugað er að vinna að á sviði efnahagslegra, félagslegra og menningarlegra réttinda.
Benedikt Árnason, ráðuneytisstjóri forsætisráðuneytisins, leiddi íslensku sendinefndina sem var skipuð fulltrúum félags- og vinnumarkaðsráðuneytisins, heilbrigðisráðuneytisins, mennta- og barnamálaráðuneytisins, innviðaráðuneytisins og utanríkisráðuneytisins.
Frá fyrirtöku Íslands nú í morgun.