Átak styttir bíðilistarnar í Sjúkrahúsverkinum

Súsanna Bertholdsen, landsstýriskvinna í heilsumálum, fegnast um, at bíðilistarnir í Sjúkrahúsverkinum eru styttir við 597 persónum higartil í ár. Hetta, eftir at Løgtingið játtaði 4,25 milliónir krónur til eitt átak, sum hevur til endamáls at stytta bíðilistar til viðgerðir í Sjúkrahúsverkinum.

Sjúkrahúsini hava í felag lagt virksemið til rættis, soleiðis at bíðilistarnir verða styttir mest møguligt við játtanini, sum er veitt til endamálið í ár. Eftir ætlan, verða bíðilistarnir styttir við tilsamans 1.100 persónum fyri ársenda.

Munagóð játtan til fleiri øki

Játtanin er brúkt til at stytta bíðilistarnar á ymiskum økjum, har Sjúkrahúsverkið hevur mett, at tørvurin er størstur, og har tað hevur verið møguligt at økja virksemið. Millum hesi eru:

• 890.000 kr. til ADHD-útgreiningar á Landssjúkrahúsinum
• 382.000 kr. til orto alloplastik (mjadnar og knø) á Klaksvíkar Sjúkrahúsi
• 98.000 kr. til pínuklinikkina á Suðuroyar Sjúkrahúsi
• 346.000 kr. til Barna- og ungdómspsykiatri á Landssjúkrahúsinum
• Umframt játtan til 19 onnur øki innan Sjúkrahúsverkið (eitt nú magatarmskurð, urologi og æðraknútar)

Betri tænastur til borgarar

Hóast tað er avbjóðandi at stýra bíðilistum, arbeiðir Sjúkrahúsverkið støðugt við at betra viðgerðartíðirnar. Júst hendan raðfestingin ger stóran mun, og hevur beinleiðis jaliga ávirkan á tann einstaka sjúklingin.

Sjálvt um bíðilistar framvegis eru, og framhaldandi fara at vera í Sjúkrahúsverkinum, er hetta eitt stórt tak fyri alt Sjúkrahúsverkið. Hetta er eisini sera týdningarmikið fyri teir sjúklingar, sum bíða eftir at fáa viðgerðina teimum tørvar, innan rímiliga tíð.