07/22/2024 | Press release | Distributed by Public on 07/22/2024 01:06
Tesiaren izenburua: Customer Data Monetisation: An In-Depth Analysis of Strategies, Economic Viability, and Implementation in the Retail Industry. A Case Study in EROSKI. BIKAIN CUM LAUDE kalifikazioa lortu zuen.
Uztailaren 16an, Maider Elorza Iturbe doktoregaiak Doktorego Tesiaren irakurketa egin zuen, izenburu honekin: Customer Data Monetisation: An In-Depth Analysis of Strategies, Economic Viability, and Implementation in the Retail Industry. A Case Study in EROSKI.
Zuzendariak: Eduardo Castellano Fernández Dk. (MIK - Mondragon Unibertsitatea-Enpresagintza Fakultatea) eta Sara Segura Querol Dk. (Mondragon Unibertsitatea-Enpresagintza Fakultatea).
Tesiaren laburpena:
Digitalizaziorako joera gero eta handiagoa da, eta teknologia eta faktore berriak agertzeak bultzatu du, hala nola konektagarritasuna handitzeak eta erabiltzaileen mugikortasunak, datuen erabilgarritasuna nabarmen handitu du. Gaur egun, erakundeek aktibo estrategikotzat aitortzen dituzte datuak. Onura ekonomikoak sortzeko estrategia bideragarriak bilatzen dituzte, eta, horren ondorioz, datuen monetizazioa gero eta ohikoagoa bihurtu da. Interes hori nabarmen argeri da elikadura-arloko txikizkako enpresetan; izan ere, enpresa horiek, bezeroarengan zentratutako ikuspegia dutenez, bezeroen datu heterogeneoen bolumen esanguratsua biltzen dute.
Testuinguru horretan, literatura zientifikoak batez ere azterlan teoriko eta deskribatzaileak lehenetsi ditu datuen monetizazioaren arloan, eta maila enpirikoan azterketa falta nabarmena utzi du, bereziki txikizkako sektore eta bezeroaren datuei dagokienez.
Beraz, tesi honetan, zehatz-mehatz aztertzen da fenomeno hau, EROSKI-n egindako azterketa enpiriko baten bidez. Hain zuzen ere, Espainian kontsumo handiko produktuak eta zerbitzuak banatzen dituen enpresa nagusietako batean. Azterketa hau funtsezkoa izan da tesiaren oinarri diren hiru ikerketa enpirikoak egiteko, ebidentziak bilduz eta datuak aztertzeko hainbat teknika erabiliz.
Lehen ikerketan, berrikuspen bibliografiko eta enpiriko sakona egin da. Berrikuspen honetan, txikizkako erakunde batek bezeroaren datuak zuzenean edo zeharka monetizatzeko erabil ditzakeen hainbat estrategia identifikatzen dituen esparru kontzeptual bat aurkeztu da. Azterlan hau zeharkako estrategia berri baten identifikazioarekin osatu da, orain arte literaturan halakotzat sailkatu ez dena. Gainera, estrategia horiek inplementatzeko arrazoiak aztertu dira, eta estrategia horiei lotutako egitura ekonomikoak nola diseinatzen diren aztertu da.
Bigarren ikerketan, literatura zientifikoari ekarpena eginez, enpresa batek bezeroaren datuak monetizatzeko estrategien bideragarritasun ekonomikoa modu eraginkorrean aztertzeko jarraitu beharko lukeen prozesua aurkeztu da. Gainera, ranking bat diseinatu da, estrategiarik bideragarriena aukeratzen laguntzen duen metodo baten bidez.
Azkenik, hirugarren ikerketan, datuak monetizatzeko estrategiekin lotutako proiektu integralak lantzen dituzten argitalpen gutxi daudenez literaturan, EROSKI-n estrategia bideragarrienetako bat garatu da. Prozesu honek sorreratik inplementazioraino hartzen du bere baitan, dagokion datuaren bizi-zikloari modu egituratuan jarraituz eta lortutako onura ekonomikoaren ebaluazioarekin amaituz.
Azken batean, hiru ikerketek ekarpen enpirikoa egiten diote literatura zientifikoari, eta tesi hau erreferentzia baliotsu bihurtzen dute txikizkako sektoreko erakundeentzat eta antzeko beste sektore batzuentzat, bezeroaren datuen monetizazioari dagokionez.