Reshje intensive në ditët në vijim, AKMC thirrje strukturave të marrin masat

Reshje intensive në ditët në vijim, AKMC thirrje strukturave të marrin masat

Gjatë ditëve në vijim parashikohet mot me reshje të dendura, kryesisht në veri të vendit.

Agjencia e Mbrojtjes Civile njofton se, bazuar në informacionin e dërguar nga Qendra e Koordinimit të Emergjencave Civile në Bruksel, Instituti i Gjeoshkencave dhe Shërbimi Meteorologjik Ushtarak parashikon që të premten, më 22 nëntor, priten reshje "intensive" deri "shumë intensive" në qarqet Shkodër, Kukës, Dibër, Tiranë dhe Elbasan

Në qarqet e tjera priten reshje mesatare, të cilat lokalisht mund të arrijnë deri në nivelin "intensive".

Në përputhje me këtë parashikim, Agjencia Kombëtare e Mbrojtjes Civile ka kërkuar rritjen e gatishmërisë së strukturave të sistemit të Mbrojtjes Civile, si dhe të institucioneve që administrojnë hidrovoret, rezervuarët, infrastrukturën rrugore, furnizimin me energji elektrike, furnizimin me ujë, monitorimin e nivelit të lumenjve dhe çdo strukturë tjetër në funksion të menaxhimit të emergjencave civile.

AKMC u bën thirrje prefekturave dhe bashkive të mobilizojnë strukturat për menaxhimin e emergjencave civile dhe të monitorojnë situatën në zonat me rrezik më të lartë.