09/04/2024 | Press release | Distributed by Public on 09/04/2024 11:18
Հանրապետության նախագահ Վահագն Խաչատուրյանին իր հավատարմագրերն է հանձնել Հայաստանում Նիդերլանդների Թագավորության արտակարգ և լիազոր դեսպանՄարիկե Հարիետ Մոնրո-Վինտերը:
Նախագահ Խաչատուրյանը, շնորհավորելով նորանշանակ դեսպանին, հույս է հայտնել, որ վերջինս կգործադրի բոլոր անհրաժեշտ ջանքերը հայ-նիդերլանդական հարաբերությունների ամրապնդման, փոխադարձ հետաքրքրություն ներկայացնող բոլոր ոլորտներում երկկողմ համագործակցությունը խթանելու ուղղությամբ: «Մենք մեծապես կարևորում ենք Նիդերլանդների հետ մեր հարաբերությունները, որոնք հիմնված են ժողովրդավարության ընդհանուր արժեքների վրա: Նիդերլանդները հայտնի է իր սկզնունքային դիրքորոշմամբ ժողովրդավարությանն առնչվող բոլոր հարցերում:
Մեր երկրները դիվանագիտական հարաբերություններ հաստատել են 1992 թվականին, սակայն դրանք առանձնահատուկ ընդգծվեցին 2019 թվականից հետո, երբ Նիդերլանդների կառավարությունը հայտարարեց Երևանում նստավայր դեսպանություն բացելու մասին:
Մեծ նշանակություն ենք տալիս մեր համագործակցությանը ինչպես երկկողմ, այնպես էլ բազմակողմ շրջանակներում, հատկապես՝ Հայաստան-ԵՄ գործընկերության համատեքստում: Կարող եմ նշել, որ այդ համագործակցությունը նպաստել է մեր երկրում ժողովրդավարական ինստիտուտների կայացմանն ու հաստատմանը: Լիահույս եմ, որ մեր համագործակցությունն այդ ուղղությամբ հետագայում ևս կշարունակվի»,-ասել է Հանրապետության նախագահը:
Հայաստանում Նիդերլանդների դեսպանը շնորհակալություն է հայտնել ընդունելության համար: «Լիովին համաձայն եմ Ձեզ հետ՝ մեր դիվանագիտական հարաբերությունների հաստատումից ի վեր, դրանք արդյունավետորեն զարգացել են, և այսօր մենք այստեղ դեսպանություն ունենք: Մեր կառավարության ցանկությունն է շարունակել աջակցել Հայաստանին, քանի որ ինչպես ճշմարտացիորեն նշեցիք Նիդերլանդները ժողովրդավարության և օրենքի գերակայության ջատագովն է: Մենք փորձում ենք օգտակար լինել և աջակցություն ցուցաբերել այն ուղղությանը, որն ընտրել է Հայաստանը»,-ասել է դեսպանը:
Հանդիպման ընթացքում քննարկվել են Հայաստան-Նիդերլանդներ համագործակցության ամրապնդման վերաբերյալ հարցեր: Երկուստեք շեշտվել է ինչպես երկկողմ, այնպես էլ Եվրամիության շրջանակներում սերտ փոխգործակցության կարևորությունը:
Կողմերը մտքեր են փոխանակել տարածաշրջանային իրողությունների և ընդհանուր իրավիճակի վերաբերյալ: Այս համատեքստում Հանրապետության նախագահն ընդգծել է հայկական կողմի հաստատուն և պատրաստակամ դիրքորոշումը հասնել կայուն խաղաղության և հարևանների հետ կարգավորված ու բարիդրացիական հարաբերություններ ունենալու հարցում: